‘तमाशा या लोककलेचा सर्वस्पर्शी आलोक साक्षात उभा करणाऱ्या’ तसंच त्यासोबतच ‘कला आणि जगणं यातला विरोधात्मक शोषण-भाव व्यक्त करणाऱ्या’ सुधारक ओलवे यांच्या छायाचित्रांचं प्रदर्शन – ‘लावणी’ १३ जानेवारी ते १८ फेब्रुवारी २०२३ दरम्यान सकाळी साडेदहा ते संध्याकाळी साडेसात या वेळेत ‘नाइन फिश आर्ट गॅलरी’ इथे साकारणार आहे. प्रदर्शनासाठी छायाचित्रांची निवड आणि मांडणी गौरमुनी दास यांनी केली आहे.

महाराष्ट्राच्या सांस्कृतिक वैभवाचा एक अविभाज्य घटक असलेल्या ‘लावणी’नं आपल्या शृंगारिक अदांनी शतकानुशतकं कितीएक मनांना रिझवलं आहे. लावणीची संवादात्मक, थेट भाषा, कधी आव्हानात्मक, हजरजबाबी, तर क्वचितप्रसंगी सामाजिक-राजकीय विडंबनात्मकही होते. समोरच्या रसिक प्रेक्षकांची अपेक्षा आणि फर्माईश पुरी करण्यात लावणीनर्तिका कसर राहू देत नाहीत. मग लावणी नर्तिकांच्या अदांमधून, विभ्रमांमधून, देहबोलीतून उत्कटपणे सादर होतो तो शृंगारभाव अवघ्या महाराष्ट्राला चिरपरिचित आहे.

पण सुधारक ओलवेंचा कॅमेरा या शृंगारिक अदा टिपण्यात रमत नाही. या अदांमागची पडद्याआड राहिलेली मजबुरी, वेदना, वंचना त्यांच्या छायाचित्रांमध्ये उतरते. लोककलेचं जोखड पिढ्या दरपिढ्या वाहणाऱ्या, जातिव्यवस्थेत पायदळी असलेल्या या समुहांचा जगण्याचा आणि तगण्याचा आटापिटा ही छायाचित्रं आपल्यापर्यंत पोहोचवतात.